HABE Liburutegia

Liburutegiaren informazio gunea

"Erabili goldea hilen hezurren gainetik", Olga Tokarczuk

Liburutegia:
HABE Liburutegia
Gaiak:
Eleberri beltza eta intrigazkoa
Gomendatuta:

Janina Duszejko basoalde bakarti batean bizi den emakume adintsua da, zubi-ingeniari erretiratua eta umeei ingeles-eskolak ematen dizkiena; William Blakeren poemak, Astrologia eta izaki bizidun guztiak maite ditu, eta animaliak hiltzen dituzten ehiztariak gorroto. Eta hain zuzen, ehiztari zenbait hilik hasi dira agertzen alderdi menditsu horretan. 

Misteriozko eleberri baten garapenarekin batera, pertsonaia liluragarri baten ezaugarri eta ertzak joango gara ezagutzen: xelebre bezain xaloa, egoskor eta maitagarria, aldi berean ahul eta ahaltsua. Baina, horrekin batera, gizarte gupidagabe honek bazterrean uzten dituen izaki guztien aldeko aldarri ozena topatuko dugu, mundu bidezko eta bizigarriago baterako deia. 

Olga Tokarczuk egile poloniarraren eleberri hau Amaia Apalauza eta Sonia Kolaczekek ekarri dute euskarara, Nobel Sariak itzultzeko Jokin Zaitegi Sariketaren barruan. Olga Tokarczukek 2018ko Literatura Nobel Saria jaso zuen.  

Bideo honetan ikus daiteke Amaia Apalauza liburuari buruz hizketan.